|
|
साढ़े बारे च
राश्ट्री अनुवाद मिशन भारत सरकार दी इक परियोजना ऐ जेह्दा उद्देश अनुवाद गी इक उद्योग
दे रूपै च स्थापत करना ते भारती भाशाएं च विद्यार्थियें ते शिक्षकें गी ज्ञान दियां
पाठ पुस्तकां उपलब्ध करोआइयै उच्च शिक्षा गी सैह्ज बनाना ऐ। लक्ष्य एह् ऐ जे भाशिक
रकौटें गी पार करियै इक ज्ञानवान समाज दी रचना कीती जा। एन.टी.एम. दा उद्देश अनुवाद
राहें भारती संविधान दी अठमीं अनुसूची च शामल सभ’नें भारती भाशाएं च ज्ञान दा प्रचार-प्रसार
करना ऐ।
रली-मिली कोशिशें कन्नै अनुवादकें गी सखलाई देना, प्रकाशकें गी अनूदित कताबें दे प्रकाशन
आस्तै प्रेरना, भारती भाशाएं च अनूदित ते इक भारती भाशा थमां दूई भारती भाशा च अनूदित
समग्गरी दे डेटाबेस दी सांभ-सम्हाल ते रख-रखाऽ करियै अनुवाद कन्नै सरबंधत सारी सरगर्मियें
गी इक थाह्र उपलब्ध करोआना। इ’नें कोशिशें कन्नै एन.टी.एम. अनुवाद गी भारत च इक उद्योग
दे रूपै च स्थापत करना चांह्दा ऐ। मेद ऐ जे अनुवाद राहें नमीं तकनीकी शब्दावली ते
भाशा शैली दे निर्माण कन्नै भाशाएं दा रचनात्मक आधुनिकीकरण होग। भारती भाशाएं दे आधुनिकीकरण
दी प्रक्रिया, खास तौर पर शैक्षणिक संवाद च अनुवादकें दी म्हत्तवपूर्ण भूमका रौह्ग।
अनुवाद गी उद्योग दे रूप च स्थापत करने आस्तै ज्ञान-अधारत पाठ पुस्तकें दा अनुवाद इस
दिशा च पैह्ली गैंऽ ऐ। सारी पाठ समग्गरी जेह्ड़ी ज्ञान दे प्रसार आस्तै बरती जंदी
ऐ राश्ट्री अनुवाद मिशन च ज्ञान-अधारत पाठ पुस्तकें दे मतैह्त औंदी ऐ। इस बेल्लै राश्ट्री
अनुवाद मिशन उच्च शिक्षा कन्नै सरबंधत सबूरी शैक्षणिक समग्गरी गी 22एं भारती भाशाएं
च अनुवाद करोआने च रूज्जे दा ऐ। राश्ट्री अनुवाद मिशन दा लक्ष्य ऐ जे ज्ञान दे बशाल
भंडार गी अनुवाद राहें भारती भाशाएं च उच्च शिक्षा दियें पाठ पुस्तकें राहें उपलब्ध
करोआया जा जेह्ड़ियां ज्यादातर अंगरेज़ी च गै उपलब्ध न। मेद ऐ जे एह् प्रक्रिया इक
समावेशी ज्ञान-अधारत समाज दे निर्माण दी दिशा तैह् करग।
|
|
|