|
|
मुंढ
राश्ट्री अनुवाद मिशन दा बचार मूल रूपै च भारत दे प्रधानमंत्री डॉ. मनमोहन सिंह हुन्दे
आसेआ आया। राश्ट्री ज्ञान आयोग(NKC), दी पैह्ली बैठक च उ’नें गलाया जे ज्ञान दे केईं
म्हत्तवपूर्ण खेत्तरें तोड़ी पौंह्च बधाने, नरंतर ज्ञान हासल करने ते शिक्षा च लोकें
दी हिस्सेदारी गी व्यापक ते मजबूत बनाने आस्तै अनूदित समग्गरी दी अत्त लोड़ ऐ। श्री
सैम पित्रोदा हुन्दी सदारत च आयोग ने इ’नें सुझाएं पर गौर करदे होई भारत च शिक्षा दे
बाद्धे-विकास गित्तै अनुवाद गी बढ़ावा देने आस्तै तौले शा तौले इक बक्ख संस्था जां
मिशन दी स्थापना दी लोड़ गी मसूस कीता।
|
ब-शक्क एह् सच्च ऐ जे भारत च अनुवाद प्रक्रिया इक परंपरा दे रूप च रेही ऐ, पर फ्ही
बी इस म्हत्तवपूर्ण खेत्तर च सिरजनात्मक सार्वजनक हिस्सेदारी दी लोड़ चेचे तौर पर देसै
च अनुवाद दी गतिविधियें, बिशे ते भाशा च मौजूद फर्कोफर्की ते कन्नै गै बंड ते पौंह्च
दे मुद्दें करियै पैदा होई। अनुवाद दियां गतिविधियां प्रतक्ख ते अ-प्रतक्ख रुजगार बी
पैदा करी सकङन, जेह्दे कन्नै पढ़े-लिखें दे बे-रुजगारें गी अपने आस्तै रुजगार दे
अलावा लोकें दी सेवा करने दा मौका बी मिलग।
|
|
अनुवाद ते मनुक्खी संसाधनें दे बकास राहें इक ज्ञानवान समाज निर्माण दी जागरुकता
ने राश्ट्री ज्ञान आयोग (एन.के.सी.) गी डा. जयती घोष दी सरप्रस्ती च इक कारजकारी दल
दा गठन करने आस्तै प्रेरत कीता जेह्दे कन्नै अनुवाद दी गतिविधियें, प्रकाशन ते प्रसारण
च रुज्झे दे लोकें ते बक्ख-बक्ख संस्थाएं गी जोड़ेआ जाई सकदा । कारजकारी दल च सरबंधत
सरकारी ते अर्ध-सरकारी संस्थाएं दे नमायंदे, विद्वान, भाशा वैज्ञानिक, अनुवादक, शिक्षाविद्,
प्रकाशक ते भारत च अनुवाद दी गतिविधियें कन्नै जुड़े दे होर लोक बी शामल हे। जिसलै
इस दल ने फरवरी 2006 च दिल्ली च बैठकें दी शुरुआत कीती, उसलै उस समें दे भारती भाशा
संस्थान दे निदेशक, प्रो. उदय नारायण सिंह हुन्दे आसेआ इस परियोजना दे मुक्ख मसौदे
दी रूपरेखा तेआर कीती गेई।
|
|
|
|
|