|
|
फोजोबनाय
|
साननाय हनायनि उदांस्रिखौ मान होनो नाजानाय बेनि जेंनाफोराव गोनांथि होनाय आरो मोनसे जथाय थांखिनि बिथांखिखौ बोजबना लानानै दाबगालांनाय गुबुन गुबुन सरासनस्रा सुबुंनि थाथायनि सायाव थानाय फोथायनाय लाबो फिनना समजारि आब्रुथि फारसे आवगायलांनायनि थाखाय भारता आथिखालाव राफोद सुबुंदारा महरै सेलायहोनो मोनसे आबुं थासरियाव सफैदों। रावा जादों जोंनि बां हारिमु जारिमिननि जिवमा आरो बांरावारिया जादों जोंनि जिव खांनायनि लामा। भारतारि रावनि जौगाथायखौ जौगानाय हाबाफारिनि मोनसे एगारहायै बाहागो महरै दुलाराय हादरा नुनो मोननाया मोजां, जाय सुबुंदारायाव सुबुंफोरनि मदद बांहोगोन आरो गेदेमा हादर महरै थाहोनायाव गोनां बिफाव लागोन। जोंनि हारिमुवा राव सरसा खालामनायनि गोनांथिखौ जेब्लाबो मोनदांबोदों। बैदिक मुगायावबो सिनथायनो गियानः सोलोंथाय ( सोलोंथाय सोदोबखौ गोदो गोदाय रिंसारथि बिगियान फोरमायनो बाहायनाय जादोंमोन, नाथाय आथिखालाव फरायनाय लिरनायनि गासै हाबाफारिखौ फोरमायनाय जायो) बियाकरनः रावखान्थि निरुक्तः सोमजिनि जारिमिन आरो सन्दः खबामा रावजों सोमोन्दो दंमोन। भारतारि रावखान्थिगिरिनि मावनाय हाबाया (संस्कृत आरो तामिल रावाव) थार ओंथियाव जौगा मान गोनांमोन , जाय राव बिगियान सरसानि गोख्रों बिथा सोरजिदोंमोन आरे गोबां गोदान बुंफोरथि (थिरांथाय ) सोरजिनायाव जोंनि बे आजै आजौनि सरसाया बिहोमा होदोंमोन। एरैबादि मोनसे सम दंमोन जाय समाव भारतनि गियान थानाय बिजाब रावसोलायनायनि गेजेरजों एसिया हादरमानि गुबुन गुबुन बाहागोवाव गोसारदोंमोन। इंराजी 18 थि आरो 19 थि जौथायाव सोनाबारि गियान , साननाय हनाय भारताव गोसारनाय लोगो लोगो रोखोमसे जाथाय जादोंमोन आरे थांनाय जौथायाव बे गियाननि हाबायाव बेरफ्रुसारदोंमोन। जायखि जादोवा , सोनाबनिफ्राय जोंनि हादराव गियान आरो बिजाबनि जाय दाहार बोहैदोंमोन बे जरखायै मखजाथाव आरो मोनसे गोनां बिथिं। जों गुबुन गुबुन आयदायाव दासिमबो इंराजी रावनि बिजाबजों सोलोंथाय लानांदों। जों ओरैबादि मोनसे थासारिजों मोगा –मोगि जादों जेराव मेट्रचेन्टारखौ गारना गुबुनाव सोलोंथाय हाबाफारिया ओनसोलारि रावाव जानांगौखौ मोनदांनो हादों , नाथाय ओनसोलारि रावफोराव सोलोंथाय मुवा- आगजुफोरा जोबोद आंखाल। फालांगि आरो सुबुं फोनांजाबनि राव महरै आथिखालाव इंराजी रावा गोबां गोसारनानै दंब्लाबो मोनथाम थाखोनि सोलोंथायनि मदद होनाय बिजों महरै बे थारैनो गोग्लैसोहांनो हमदों। बेनिखायानो फरायसालि आरो फरायसालिमायाव रावारि बोखारनाय / सोलायनाय मोनसे जेंना महरै नुजाथिदों। फरायसा / सोलोंसानि राव आरो फोरोंनाय रावनि गेजेराव गोबां फारागथि नुजाथिदों।
जौगाहोनांगौनि गोनांथिखौ आरोंदायारि बिरोंदामिननि जौगानायाव नोजोर होनो हायो। सरासनस्रा राव सोलायस्लु बिखान्थियाव (NLP) मदद जानाय बादि कपार्च आरो हाबाबिखान्थि जगायनायाव जोंनि राव आरो रावखान्थियारि फोरमायथिया मदद होनो हायो। खारिथि –बिरोंदामिननि मुलुगाव जों दासिम मोनसे गोख्रों एबा गोगोम राहा लानो हाबाय आरो बे खाबुखौ मेसिन मददगोनां रावसोलायनायनि बेलायाव गोसार होनाया मोजां। बेखौ मिजिं थिनाय जादोंदि गासै सोमोन्दो गोनां एजेन्सिया गासै भारतारि रावखौ बिरोंदामिनारि राहाफोरजों फोनांजाबनो जिवै माहामयै नाजागोन जाय माहारिफोरनि मोनथाय आरो लोगोसे रावसोलायनायखौ गोख्रैथि महर होनायाव मखजाथाव बिहोमा होगोन।
रावा जादों जायगा आरो समनि गेजेराव मोनसे बेसेन गोसा अनथोब। बेखौ गुबुन रोखोमै बुंथिनाय आरो रावनि गेजेराव फारागथि एबा दावराव दावसि सोरजिना खाबु लानो हास्थायग्राफोरखौ जों नेवसिगारनाया मोजां। जों बयनोबो मोनसे रोखा रादाब दैथाय हरनाय मोजांदि रावा जादों फुंखा आरो बांरावारिया जादों सम्पद। जों मोनदाङोदि मानसि महरै जोंनि बराद , जोंनि रावनि बरादजों नागारनो हायै सोमोन्दो आरो जों बेनि मददाव आरो गेजेरजों गियान लानो हायो। जों एरैबादि मोनसे हारिमुनि थाखाय साग्रां जानाया मोजां जेराव मोनसे रावनिफ्राय गुबुन मोनसे रावाव गियाननि दाहारा गोसारनो हागोन। हादरारि रावसोलायनाय मिसन बेयाव बिथांखि लानाय बादि गियान थानाय बिजिरसं आरो सोलोंथायारि होनाय लानाय जौगाहोनायजों लोगोसे भारतनि गोसै बिथिंनि राव जौगाहोनायाव नांगौबादि आगजु जानो हागौ।
|
|
|