ঐখোয়গী মরমদা

জাতিগী লোন হন্দোকপা মিশন (এন.তি.এম) হায়বসি লোন হন্দোকপবু ইণ্ডষ্ট্রি অমা ওইনা লিংখতনবা অমসুং লৌশিং-জ্ঞানগী পূক্কৈ ওইবা লাইরিকশিংবু মরুওইনা ভারতকী লোনশিংদা হন্দোক্তুনা মহৈরোইশিং অমসুং লাইরিক-লাইশু হৈরবা অখঙ-অহৈশিংদা ফংহন্দুনা অৱাংবা থাক্কী মহৈ-মশিং তম্বদা হেন্না লায়থোকহন্নবগীদমক ভারত সরকারনা পায়খতপা পোরম (ষ্কিম) অমনি৷ মসিগী মঙলানদি লোননা মরম ওইবা খুরৌশিং হন্থহন্দুনা লৌশিং-জ্ঞান্না থল্লবা খুনাই অমা শেমগতপনি৷ এন.তি.এম.গী পান্দমদি হন্দোকপগী মতেংনা ভারতকী সংবিধানগী ৮ শুবা সেদ্যূলদা চল্লবা লোন পূম্নমক্তা লৌশিং-জ্ঞানবু পাকশন্না শন্দোকখিবসিনি৷

হন্দোক্লোয়শিংবু তাকপী-তম্বীনবা, হন্দোক্লবা মচাকশিং ফোঙদোক্নবা ফোঙদোক্লোয়শিংবু পূক্নীং থৌগতপীনবা, ভারতকী লোনশিংদগী অতোপ্পা লোনশিংদা, অতোপ্পা লোনশিংদগী ভারতকী লোনশিংদা অমসুং ভারতকী লোন অমদগী লোন অমদা ফোঙখ্রবা হন্দোক্লবা মচাকশিংগী ডেটাবেজশিং কায়দনা থম্নবা অমসুং হন্দোকপগা মরী লৈনবা পাউশিং পীবা ঙম্বা মফম অমা কনবা ঙম্নবা অপূনবা থবকশিং পায়খতলি৷ হায়রিবা থবকশিং অসি পায়খতলগা এন.তি.এম.না হন্দোকপবু ভারততা ইণ্ডষ্ট্রি অমা ওইনা লিংখতনবা হোতনরি৷ হন্দোকপগী পাম্বৈনা অনৌবা টর্মশিং অমসুং দিসকোর্স ষ্টাইলশিং পুথোক্লগা লোনশিংগী চাউখত-খোঙজেল য়াঙখতহন্নবা আশা তৌরি৷ হন্দোক্লোয়শিংনা লোনশিংগী চাউখত-খোঙজেল হায়বদি মরুওইনা ভারতকী লোনশিংগী ওইবা একাদমিক দিসকোর্স অসিদা মরুওইবা থৌদাং অমা লৌগনি৷

লৌশিং-জ্ঞান পীবা লাইরিকশিংবু হন্দোকপসি হন্দোকপবু ইণ্ডষ্ট্রি অমা ওইনা লিংখতনবগী পান্দমদা চঙশিনবা অহানবা খোঙথাংনি৷ লৌশিং-জ্ঞান শন্দোক্নবগী মরম ওইবা লাইরিক্কী মচাক পূম্নমক্না এন.তি.এম.গীদমক লৌশিং-জ্ঞান পীবা লাইরিকশিংগী কোর্পস ওই৷ হৌজিক্কী ওইনদি এন.তি.এম. অসি অৱাংবা থাক্কী মহৈ-মশিংগা মরী লৈনবা তম্ননবা মচাক পূম্নমক ভারতকী লোন ২২দা হন্দোকপগী থবক্তা মায় ওনশিল্লি৷ অৱাংবা থাক্কী মহৈ-মশিং তম্বগা মরী লৈনবা ইংলিসতনা নম্না ফংবা লাইরিকশিংবু ভারতকী লোনশিংদা হন্দোক্লগা লৌশিং-জ্ঞানগী পাক-চাউরবা মশা অমা শেমগতনবা এন.তি.এম.না পান্দম থম্লি৷ হায়রিবা থবক অসিনা কায়নথংদা মপূংফারবা লৌশিং-জ্ঞান্না থল্লবা খুনাই অমা শেমগতনবা লম্বী অমা য়াতকনি হায়না আশা তৌরি৷