চেহাপ – ২

জাতিগী লোন-হন্দোকপা মিশনগীদমক থাঙ্গতখিবা ৱারোল
এন কে সিদা জয়তি ঘোসনা থাগতখিবা
(ইং ২০০৬ গী ফেব্রুৱারী ১১, এন কে সিনা পাঙথোকখিবা হন্দোকপগী ৱার্কশোপতা খন্ন-নৈনখিবা অদুগা মদুদা য়াওররিবা মীওইশিং লোয়ননা অতোপ্পা মীওইশিংগা খন্ন-নৈনবদা য়ূম্ফম ওইদুনা শেমগতপা)

লৈবাক শীন-থুংনা ৱাখল-লৌশিং হেন্না ফংহনবা ঙম্নবগীদমক মখল কয়াগী হন্দোক্লবা মচাকশিং (মীনা, মেচিনগী মতেংনা, অসিনচিংবা) অমসুং তোঙান-তোঙানবা হীরম কয়াদা (সাহিত্য, বৈগ্যানিক, টেক্নিকেল, ললোন-ইতিক অসিনচিংবা) অথুবা মতমদা হেনগত্হনবগা লোয়ননা মগুন ফগত্হনবা তঙাইফদে ৷ অফবা মখলগী হন্দোক্লবা মচাকশিং হেনগতহনবা অমসুং ফংহনবা ঙম্নবা খ্বায়দগী ফবা লম্বী অদুদি জাতিগী লোন-হন্দোকপগী মিশন অমা লিংখত্পা অসিনা ওইগনি ৷ মসিনা অহোবা কয়া খঙদোক্তুনা ফজনা মগুন লৈরবা হন্দোক্লবা মচাকশিং চাওখতহনবা, শিল্লম-শিন্তাকপা, হন্দোকপগী থবক অমসুং হন্দোক্লোয়শিংগী মরমদা ঈ-পাউ শন্দোকপা অমসুং সরকার অমসুং লন্নাইগী চত্থরিবা থবকশিংদা খূতশম্নবগী থবকশিং খুদক্তা পায়খত্কনি ৷ ৱাখল্লোন অসি অতোপ্পা কাঙবুশিংগী থবক অমুক হনজিন্না তৌবা নত্ত্রগা মখোয়বু নমহত্পা হায়বা নত্তে ৷ মখোয়গী থবকশিংগী অহান-অকোন লেপ্পা, মগুন হেনগত্হনবা অমসুং হীরম অসিদা মীয়াম পূন্না খঙমিন্ননবা হোতনবদা তেংবাং পীবা হায়বনি ৷

থৌরম অমা ওইনা, লোন-হন্দোকপগী থবকসি ভারতকী লৈবাক কয়াদা মতম কুইনদগী লোন জুরা কয়াগী মরক্তা চত্থরক্লি ৷ পূক্নীং নুংশিনীংঙাই অমা ওইনা, হন্দোকপা হায়বসিনা ভারততা অমসুং অতোপ্পা মফমশিংদা তোঙান-তোঙানবা লোন ঙাঙলিবা কাঙবুশিংদা অৱাংবা ৱাখল্লোন কয়া থবক ওইনা ঊতলি ৷ শিনফম অমা ওইনদি হন্দোকপা হায়বসি য়াম্না শীংননীংঙাই ওইবা থবক অমনি অমসুং হৌখিবা চহী খরসিদগী শেন্থোক ফজনা লৈবা শিনফম অমসু নোংম-নোংমগী ওইরক্লি ৷ থিজিন-হূমজিনবগী লমদা, হন্দোকপগী থবকসি ৱাখল্লোন কয়াগা লোয়ননা থোক্লকপগুম তৌরি৷ খুদম ওইনা লোন্মীতলোন, ৱাঙুরোন, সাহিত্যগী মহৈ, সেমিওতিক্স, লেক্সিকোলোজি, এনথ্রোপোলোজি, কম্প্যুটার সাইন্স, অমসুং অতোপ্পা হীরম কয়া অসিদনি ৷ অদুবু মসিগী লোন, নাত অমসুং লৈবাক কয়াদা শন্দোক্লিবা মওং অসি য়েংলুরগদি হীরম অসিগী থবক-থৌরমশিংদা খূত্শম্ননা তৌবগী অৱাত্পদু অসুম্মক লৈরি হায়বা য়াই ৷

লোন য়াম্না ঙাঙবা অদুগা নাত য়াম্না লৈবা লৈবাক অমা ওইনা অমসুং ৱাখল-লৌশিংগী অরিবা হৌরকফম ওইরিবশিংগী মরক্তা অমা ওইনা ভারত, চহীচা কয়াদগী হন্দোকপগী থবক্তা মাঙজিন থারক্লি ৷ লোন অমসুং নাত কয়াসিগা লোয়ননা লৈবাক অসিনা মরু ওইবা থীওরিগী খোঙথাংশিং, সাহিত্য নত্ত্রগা অতৈ অইবা মচাকশিংবু হন্দোকপা অমসুং মেচিনগী মতেংনা হন্দোকপা অনীমকসিদা নীংথিনা চাংয়েং তৌবগী খুদোং চাবা কয়াসু পীরি ৷ হৌদোক্লিবা জাতিগী লোন-হন্দোকপগী মিশন অসিনা মতম কুইনদগী দরকার ওইরক্লবা অৱাতপদু কোকহনবা ঙমগনি হায়বগী থাজনরি ৷ মদু মখাগী কাঙবুশিং, খূদম ওইনা- ওজাশিং, মহৈরোয়শিং, লোনগী টেক্নোলোজিগা মরী লৈনবা মীওইশিং, ললোন-ইতিক তৌরিবা কাঙবুশিং, পাউচে পুথোক্লিবা অমসুং অতোপ্পা পাউমীগী কাঙবুশিং, অইবশিং, অপাবশিং, চাংদম্নবগী মহৈশিংদা য়াওরিবা মীওইশিং অমসুং লোন-হন্দোকপগী থীওরিগী মতাংদা লৈরিবা মীওইশিং অসিনি ৷

এন তি এমগী পান্দমশিংদু মখাগীশিংসি ওইগনি -
১) ভারতকী লোনশিং য়াওনা হন্দোকপগী থবক্তা ঈ-পাউ থম্ফম অমা ওইনা থবক তৌবা ৷ ফোঙখ্রবা লাইরিকশিং, শিল্লম-শিনতাক্কী থৌরমশিংগী মতাং-মতম, হন্দোকপগী লমদা ফংলিবা পাম্বৈ অমসুং খূত্শু-খূতলায়শিং, নৌনা পায়খতলিবা খোঙথাংশিং অমসুং পীরিবা খুদোংচাবশিং ৷ খুদম ওইনা ‘জাতিগী ওইবা হন্দোক্লোয়শিংগী মিংজন’ হায়রিবশিং অসিগী মতাংদা ঈ-পাউশিং পুথোক্তুনা, নীংথিনা থমদুনা অমসুং লেপ্তনা ঈ-পাউশিং নৌথোকহন্দুনা লোন হন্দোকপগী হীরম খুদিংমক্কা মরী লৈনরিবা ঈ-পাউশিং থম্বা ৷
২) থীওরি অমসুং প্রেক্টিকেল অনীমক্তা, ঙম্লিবা মখৈ ভারতকী লোন কয়াদা, হন্দোকপগী থবক-থৌরম খুদিংমক্কি পূনফম অমা ওইনা থবক তৌবা ৷
৩) ভারতকী লোনশিংদা লৈরিবা হন্দোকপগী নত্ত্রগা মসিগা মরী লৈনবা থবকশিংদা য়াওরিবা অতোপ্পা এজেন্সিশিং, লন্নাই মীওইশিং লোয়ননা তোঙান-তোঙানবা লূপশিংগগী মরক্তা মরী লৈনহনবা ৷
৪) ভারতকী লোনশিং অমসুং সাহিত্যবু লমদম অসিদা অমসুং মপানগী লমশিংদা মগুণ লৈনা হন্দোক্তুনা খঙহনবা
৫) হন্দোকপগী পাম্বৈ অমসুং খূতলায় কয়া পুথোকপগা লোয়ননা নীংথিনা থম্বা, অদুগা মরু ওইনা লোন অনী নত্ত্রগা অনীদগী হেনবদা হন্দোকপগা মরী লৈনগদবা লোনগৈশিং, ৱাহৈ-লোনগৈশিং অমসুং ৱার্দ ফাইন্দরশিং শেম্বা; অমসুং
৬) হন্দোকপগী মতাংদা থৱায় য়াওবা মীওইশিং অমসুং শিন্দমশঙশিং কান্নবা ফংহন্নবগীদমক হন্দোকপগী মহৈগা মরী লৈনরিবা থবকশিংবু পূন্না নত্ত্রগা লন্নাই ওইনা নমথোকপা অমসুং ফোঙদোকপগী থবক্তা চাওখত্হনবা৷
৭) মীয়াম্না তুংদা হংলকপা ৱাহংশিংগী পাউখুম পীননবগীদমক বুলেটিন বোর্দ অমা শেমদুনা ৱারী-ৱাতায়গীদমক ফোরাম অমা থম্বা
৮) হন্দোকপগী থৌওংদা/মওং মতৌদা লমজিং-লমতাকপা, অমসুং হন্দোকপগী মহৈদা তাকপী-তম্বীবগী লোয়ননা শিল্লম-শিন্তাকপগী থবকশিং ফগত্হন্নবা থবক কয়া পায়খতপা

জাতিগী লোন-হন্দোকপা মিশননা পায়খতনবগীদমক থাঙ্গতখ্রবা মরু ওইবা থবকশিং
হন্দোক্লোয়শিংবু মহৈ পীবা :
মসিনা ঊতলিবা অশেংবা মশক অদুদি, হন্দোকপগী থবক অসিনা তঙাই ফদনা লোন অনীদি চঙবা মরম্না, মসিদা ভাবনা হেক্তা শাজিনবা য়াদবা, শূংশোয়মক শোয়দনা মতাং খরদি তমদবা য়াদবা, থাঙৈশেংনা হৈ-শিংবা অমসুং খঙ-হৈবা চঙবা থবক অমনি ৷ মসিগী মথক্তা, তোঙান-তোঙানবা হীরমদা হন্দোক্কদবা ওইবনিনা তোঙান-তোঙানবা হীরমশিংদুদা হৈ-শিংবা অমসু চঙই ৷ খুদম ওইনা, বিগ্যান নত্ত্রগা টেক্নিকেলগী থবকশিং হন্দোকপা হায়বসি সাহিত্য হন্দোকপদগী খেন্নৈ অদুনা মতাংসিদা য়াম্না তোপ-তোপ্না হৈ-শিংবা অমসুং খঙ-হৈবগী মথৌ তাই ৷ অমুকসু, ঈ-পাউ শন্দোক্লিবশিং (খুদম ওইনা রেদিও নত্ত্রগা টি ভি) অমসুং কন্টেক্সকা মরী লৈননা হন্দোক্লিবা অমসুং লোন ফাওননবগী থবক তৌরিবা অসিদসু হৈ-শিংবশিংগী মতাংসিমদি মপুং ফাদ্রি অদুনা অখন্ননা তম্বা অমা চঙলি ৷

লম অসিদা এন তি এমগী পায়খতকদবা থবক থৌরাংশিংদা য়াওগদবশিংদি মখাগী অসিনি:
  » অতেনবা মতমগী ওইবা শিল্লম-শিন্তাকপগী থৌরাংশিং পায়খতপা ৷
  » লৈবাক শীন-থুংনা লোন তম্বীবগী শরুক অমা ওইনা হন্দোক্লোয়শিংগীদমক মতেং ওইগদবা তম্ন-হীরমগী পেকেজ শেম্বা ৷
  » শিন্দমশঙশিংগী মরক্তা মায়চৌশিং শিন্দোক-শিনজিন তৌবা য়ানবগীদমক শেন-থুমগী মতেং পীবগী থৌরাং থম্বা ৷ মতাং অসিদা, ইংলিশতা নত্ত্রগা ইংলিশতগী হন্দোকপখক নত্তনা ভারতকী লোনশিংগী মরক্তা হন্দোকপদা অখন্নবা মীতয়েং অমা থম্বা য়াই৷
  » থিজিন-হূমজিনবগা মরী লৈনবা প্রোজেক্টশিংবু পূক্নীং থৌগত্পগা লোয়ননা থিজিন-হূমজিল্লিবা মহৈরোয়শিং য়াওনা, খুদম অমা ওইহন্দুনা শকখঙলবা লাইরিকশিংগী অফবা হন্দোক্লবা মচাকশিংবু মরু ওইনা ফংহন্নবা হোতনবা অমসুং তাকপি-তম্বীবগী পান্দমশিংদা কান্নবা পীবা ঙম্নবা মচাকশিং পুথোকপা ৷

ঈ-পাউ শন্দোকপা
হন্দোকপগী থবকসি মীয়াম্না য়াম্না খঙনবা অদুগা য়াম্না শীংথানবা থবক অমা ওইদবনা, লৈবাকসিদা হন্দোকপনা তৌবা ঙম্বা থবকশিংগী মতাংদা, মদুবু শীজিন্নগদৌরিবা মীওইশিংগী মরক্তা ফাওবা, ৱাখল-লৌশিং মপূং ফানা লৈত্রি ৷ খুদম ওইনা হায়রবদা, অফবা হন্দোক্লোয় কয়া অমা অখন্নবা লোন কয়াদা লৈরি অদুবু মখোয়বু লাইরিক ফোঙলিবা মীওইশিংনা খঙবিদবা অদু নতত্রে হায়রগনা, মখোয়গী থবকশিংদুবু শীজিন্নরিবা মীওইশিংনা খঙদবা কয়া লৈবা অসিনি ৷ ভারতকী লোনশিংগী নৈন-শঙলেন, (সি আই আই এল), মহিশুর, ভারতনা জাতিগী লোন অমা নীংথিনা ঙাঙলিবা, চাউরাক্না ওঝা ৪০০ রোমবু, চহী খুদিংগী শহর ৭তা লৈরিবা মসিগী রিজনেল লেঙ্গুএজ সেন্তরদা ভারতকী খনগতলবা লোন ২০গী মনুংদগী লোন অমমমবু তোঙান্না খল্লগা তম্বিরি ৷ মসি অতাঙবা মহৈ অমদি ওইরি অমসুং হৌজিক্তা মরু ওইবা অমা ওইনসু লৌনরক্লি ৷ অদুবু, মসিদা তম্বিখ্রবা মীওইশিং (হৌজিকফাওবদা চাউরাক্না ১১,০০০) অসি মফম চানা শীজিন্নদুনা থবক্তা লৈরবা মীওই অমমম ওইহনবা ঙম্বা হায়বদুদি ওইদ্রি ৷ লোন কয়া অমদা, অপীকপা ফোঙদোক্লোয় কয়ানা মফম কয়াদা হন্দোক্লবা মচাক কয়া অমা শেমখ্রে অমসুং নমথোক্তুনা ফোঙদোকখ্রে ৷ অদুবু, মসিগী মহৈ ওইরিবা পোত্থোকশিংসি মীয়াম হূপ্না খঙবা হায়বদুদি ওইদ্রি ৷

মরম অসিদগী, হীরমসিদা এন তি এমগী মরু ওইনা পায়খতকে খল্লিবা থবকশিংগী মনুং চনগদবশিংদু:
  » তোঙান-তোঙানবা লমশিংদা হৈ-শিংলবা অমসুং মতিক চারবা হন্দোক্লোয়শিংগী দাতা তূংশিনফম শেম্বনা ওইগনি ৷ তূংশিনখ্রবা দাতাশিং অসি ওন-লাইন্দা ফংহনগনি অমসুং দরকার ওইরকপগী মতুং ইন্না এন তি এমগা পাউ ফাওনরগা ফংহনগনি ৷
  » দাটা তূংশিনফম শেম্বগা লোয়ননা হন্দোকপগী মতাংদা লৈরিবা থবকশিংগী মরমদা তোঙান-তোঙান্না খায়দোক্তুনা খঙহন্নবা কেটলোগ শেম্বা অমসুং মদু চাং নাইনা মহৈ তম্ফমশিং অমদি লাইব্রেরী নেটৱার্কশিংদা য়ৌহন্নবা অনৌবা লিষ্টশিং শেম্বনা ওইগনি ৷

অফবা মগুন লৈরবা মচাকশিংবু হন্দোকপদা পূক্নীং থৌগত্পগা লোয়ননা মীয়ামদা খঙহনবা
খন্নবা য়ারিবা ৱাফমদি, করিগুম্বা হীরম কয়াদা হন্দোক্লবা মচাক কয়া অমগী মথৌসি হেন্না তারম্লগদি মদু কৈথেলদগী হান্ননা ফংনরম্লগনি ৷ অদুবু, ওইথোকপা য়াবা অসিগী মতাংদা ৱাখল তৌনরুদবনা দিমান তৌবগী ৱাখল পোক্নরুদে ৷ ইশানা থেংনরুদ্রিবা ফাওবদি করি ৱাতলিবগে হায়বদুসু, অতোপ্পা ৱাখল-লৌশিংগী মতাং কয়াদসু খঙবা ঙমদে ৷ মখা তারকপদা, সহিত্যগী মচাকশিং হন্দোকপগী থবক্তা লৈরিবশিংনা (খুদম ওইনা নেসনল বুক ট্রষ্ট অমসুং গ্রন্ঠ একাদমিশিং) লম-লমগী লোনশিংদা হন্দোক্তুনা লাইরিকশিং অমুক্তংবু পুথোকখ্রবদি, মশীং থীঙমদনা দিমান কয়া তৌরক্কনি হায়বগী থাজবা লৈ ৷

খঙজিনবদা মরু ওইরিবদি, অসিগুম্লবা হন্দোক্লবশিংসি ইংলিশতগী ভারতকী লোনশিংখক্তদা হন্দোক্তুনা শূপ্নগী মায়কৈ অমত্তগী ওইহল্লোইদবনি ৷ মদুগী মহূত্তা, ভারতকী লোনশিংদা লৈরিবা লন কয়াদু ইংলিশ লোন অমসুং ভারতকী অতোপ্পা লোনশিংদা হন্দোক্তুনা হেন্না পাকথোক চাউথোকপগী তঙাই-ফদবসু লৈরি ৷ তশেংনা হায়রবদা, হন্দোকপবু চপ মান্নবা থাক্তা খব্রাংনবা মীতয়েং থম্লিবা চতনবী অসিদা পূক্নীং থৌগত্কদবনি ৷ মচাক মরন কয়া পীরিবা লোন অদুগা, মদুবু ফংলিবা লোন অদুগা অনীসিগী মরক্তা খেন্নবা লৈহন্দনবা হোতনবা অমসুং ভারতকী লৈরিবা লোন য়াম্না শীজিন্নবগা লোয়ননা চতনবা তিন্নদবা কয়া অসিবু মান্ননা চাওখত্হনবগী মথৌ তাই ৷ অকক্নবা হীরম খরদা হন্দোক্লবা মচাক খরদি য়াম্না হেন্না পুথোকপসু হান্ননা লৈরে (খুদম ওইনা হায়রবদা তোঙান-তোঙানবা লোন কয়ামরুমদা হন্দোকখ্রবা দোক্তর অম্বেদকরগী থবকশিং), মসিনা মীয়াম্বু পাক-শন্না মথুম-মরাং হৌহনবগা লোয়ন-লোয়ননা নৌনা হৌরক্লিবা লাইরিক-লাইশু হৈরবা মীওইশিংগী দরকার ওইরিবশিং অমসুং পূক্নীং-থৌনা হাপ্পগী মতাংদা ইনোত পীরি ৷

সাহিত্যগী মচাকশিং হন্দোকপসিদগী তোঙাল্লিবা, বিগ্যান অমসুং টেক্নিকেলগী ওইবা হীরমশিং হন্দোকপগী মতাংসিদা লৈরিবা ৱাহৈ অমসুং ৱাখল্লোনশিং অসি চাওখত্হনবগী মথৌ তারি ৷ মসিনা নীংথিনা খঙহনবা অদুগা লোনশিংদুদা লায়না শীজিন্নবা ঙমহনগনি ৷ মতুং তারকপদা, হন্দোকপা হায়বসি হৌজিক্কী মতমদা মীয়াম্না কয়া শীংথানবা ৱাত্পা, খঙনদ্রিবা অদুগা শেন্থোক্কী মতাংদসু কয়া নীংথিনা ফদ্রিবা থবক অমা ওইরি ৷ মসি অহোংবা অমা পুরকপা মথৌ তারি ৷ খঙজিনবদা কান্নগদবা মরু ওইরিবা ৱাফম অমনা, হন্দোকপা হায়বসি লন্নাই মীওই অমনা তৌবা থবক্নি অদুম ওইনমক সমাজগী ওইবা কান্নবা কয়াসু পুরকই ৷ থৌরাং অসিনা মায় পাকপা হায়বসি তোঙান-তোঙানবা মীওই মখল নত্ত্রগা কাঙলুপ কয়ানা মতাং কয়াদা পূন্না শরুক য়ামিন্নবগী মহৈ ওইগনি৷

মতাং অসিদা, মখাদা পীরিবা এন তি এমগী থবকশিংসি নীংশিংবা য়াইঃ:
  » লাইরিক ফোঙবা অমসুং লাইরিক মেলা পাঙথোকপা, শেল অমসুং মনা-মথুম কয়া পীদুনা অফবা মগুন লৈবা হন্দোক্লবা মচাকশিংবু চাওখতনবা হোতনবা ৷
  » পূনশিন্দুনা হন্দোকপগী থবকপু পূক্নীং থৌগত্পা, লোয়ননা হন্দোক্লোয় মখল কয়ানা পূনশিন্দুনা অশাংবা মতমগী ওইবা হন্দোকপগী প্রোজেক্ট পায়খতপা অমসুং হন্দোক্লোয়শিংগী মরক্তা ৱারী-ৱাতাই শাননবা, মীতয়েং অমসুং ফংলকপা ৱাখল্লোন পীথোক-পীশিন তৌননবা ৱার্কশোপশিং শিনবা/পাঙথোকপা ৷
  » লাইরিকশিং লৈবা অমসুং য়োনবগী থবকখক্তা নত্তনা হন্দোক্লবা অফবা লাইরিকশিং কৈথেনদা ফংহনবা ঙম্নবা ফোঙদোক্লোয়, লাইরিক য়োনবা দুকান অমসুং লাইরিক্কোনশিংগা মরী থম্বা
  » হন্দোক্লবা মচাকশিং পুথোক্লিবা কাঙবু অমসুং মদুবু ফোঙদোক্লিবা নত্ত্রগা লৈরিবা কাঙবুশিংগী মরক্তা, মীয়ামগী অমসুং লন্নাইগী থাক্তা লৈরিবা লূপশিং য়াওনা মখোয়গী মরক্তা ফাওননবা শীনবা ৷
  » হৌজিক-হৌজিক থোক্লিবা ঈ-পাউ ফোঙলিবা পাউচে অমসুং অতোপ্পা কান্নরবা অদুগা নুঙাইরবা মচাকশিং অহানবা ওইনা লম-লমগী লোনশিংদা পাক শন্না খঙহন্ননবা লোন-হন্দোকপগী থবক্তা শেন থাদবা (খুদম ওইনা দ ন্যিউ সাইন্তিস, ইকোনোমিক এন্দ পোলিটিকেল ৱিক্লি অসিনচিংবা)৷
  » হন্দোক্লবা মচাকশিংবু মহৈশঙ, মহৈশঙলেন অমসুং তাইবং মহৈকোলশিংদা অমসুং মরু ওইনা সাহিত্যগী মহৈ তম্লিবশিংদা থাক খুদিংমক্কি সিলেবাসশিংদা য়াওহন্দুনা ভারতকী অতোপ্পা লোনশিংদগী হন্দোক্লকপা থবকশিং তম্বিনবগী ৱা হৌদোকপা
  » মহৈশঙ, মহৈশঙলেন অমসুং অখন্নবা মহৈশঙশিংগী লাইরিক ফংফমশিংদা লোনগী রিসোর্স সেন্তরশিং (হন্দোক্লবা মচাকশিংগা মরী লৈননা) হাংনবা ৱা হৌদোকপা
  » লোন অনী খঙবা ঙম্বগী হৈ-শিংবদু হেনগত্হন্নবগীদমক পায়খতলিবা অপীকপা খোঙথাংশিংবু ফগত্হনবা অমসুং মীয়াম পূন্না খঙহন্নবা হোতনবা (খুদম ওইনা করনাটকা পুলিস ওফিসারশিং খনবগী চাংয়েংদা য়াওরিবা তঙাইফদনা হন্দোক্কদবা তাংকক অদুনি) ৷
  » মীয়াম অমসুং সিভিল সোসাইতিগী লূপশিং (খুদম ওইনা জাতিগী ইবা-পাবা ঙমহনবা মিশন অমসুং দ ভারত গ্যান সমিতি)গী মতেং লৌদুনা হন্দোক্লবা মচাকশিং অপীকপা শহর অমসুং খুঙ্গংশিংদা হেন্না ফংহনবা ঙম্নবগী পাম্বৈশিং খন্নবা

মেচিন্না হন্দোকপগী থবকপু চাওখত্হনবা
অনৌবা টেক্নোলোজিশিং অসিনা হন্দোকপগী থবক্তা অচৌবা ভোল্যুমবু থুনা অমসুং অহোঙবা মমলদা ফংহন্নবগীদমক অনৌবা নুঙাইরবা, পূক্নীং থূহ্মতনীংঙাই ওইরবা তানজা কয়া পীরি ৷ মতাং অসিদা টেক্নোলোজি চাওখতহনবগী অদুগা মীওইবনা পুথোক্লিবা পোত্থোকশিংগী মরমদা ৱাফম কয়াদি অদুম্মক লৈরি ৷ এন তি এমনা টেক্নোলোজি শেম্বা, শীজিন্নবা, অদুগা মেচিনগী মতেংনা হন্দোকপগী থবক্তা শীজিন্নরিবা টেক্নোলোজিশিং খুমাঙ চাওশিনহনবদা মখাগী পাম্বৈশিং অসি পায়খত্তুনা তেংবাংবা ঙমগনি:
  » য়াম্না হেন্না লায়না অমসুং মায় পাক্না লোন-হন্দোকপা ঙমহন্নবা অথুবা মতমদা শীজিন্নগদৌরিবা দরকার লৈবা ইনফ্রাষ্ট্রাকচরশিংগী মনুংদা মরু ওইরিবদি দিজিটেলগী ওইবা পাম্বৈশিংনি৷ খুদম ওইনা পল্লবদা- ৱাহন-লোনগৈ, লোন অনীগী লোনগৈ, লোন হন্দোক্নবা শোফৱ্যের, মেমোরি অসিনচিংবা কয়া অসি শেম্বগী থাজবা পীবা ৷
  » ৱাহৈগী পূক্কৈশিং খুদম ওইনা ই-লোনগৈ, ৱার্দ নেটশিং, লোন নৈননবা অমসুং শেম্নবা খূতলায়শিং, কনকোর্দেন্সরশিং, ৱাহৈ তোয়না য়াওবা খঙনবা পাম্বৈ অসিনচিংবা অসি মেচিন্না লোন-হন্দোকপগী তঙাইফদ্রবা পোত্চাকশিংনি ৷ হায়রিবশিং অসি কাঙবু অমখক্তনা শেম্বা অমসুং শীন-লাঙবা ঙমদে, মরম অসিনা লূপ কয়া অমগা পূনশিন্দুনা মতম শাংনা হোতনমিন্নবা চঙই ৷ ওনলাইন অমসুং মীফম কয়াদা খন্ন-নৈনদুনা, ঈ-পাউ ফাওনদুনা এন তি এমনা মীয়াম পূন্না থবক তৌমিন্ননবগী মফম অমা পীবা ঙমগনি ৷
  » এন তি এমগী দরকার ওইবা কোপিরাইটকী ৱাফমশিংগা লোয়ননা, হন্দোক্লিবা মচাক অমসুং হন্দোক্লবা মচাক অনীমক্তু ঙম্লিবমখৈ দেজিটেল ওইনা নীংথিনা ফংহনবা ঙম্নবা হোতনগদবনি ৷ দিজিটেল ওইনা ময়েক লারবা লন অসি এক্স এম এল তেগ অমসুং দি টি দিশিং শীজিন্নদুনা থাক ৱাংবা মওংদা এন তি এমনা থম্বগী থাজবা থম্লি৷
  » মালেমগী ওইনা হৌজিক্কি মতমদা চতনরিবদি, য়াম্না মগুন লৈরবা পেরালাল কোর্পোরাশিং এন্নোতেশন অমসুং এলাইনমেন্ট তৌদুনা চাওখত্হনবা হায়বসিনি ৷ অসিগুম্বা কোর্পোরা অসি, মেচিন্না হন্দোকপগী থবকশিং মায় পাক্না পাঙথোকপা ঙম্নবগীদমক মেচিনবু মসিগা মরী লৈনবা টেক্নিকশিং খঙহন্নবা হোতনবদা শীজিন্নবা য়াই ৷ দেটাশিং অদুগী অপূনবা ভোল্যুম অমসুং হোতনগদৌরিবশিং অদুনা পাক চাউবা (মেগনিট্যুদ) অদুগীদমক, লূপ অমখক্না শেম্বা নত্তবা, পাক-শন্না অহানবদা হোতনমিন্নবগী খোঙথাংশিং চঙই ৷ অদুগা মতৌ অসিগুম্না হোতনবশিং অসিদা এন তি এমনা মতেং পাংবা অমসুং ঙাক্লৌ পীবা ঙমগনি ৷
  » ১৯৯৬তা য়ুনাইনেত নেসন্সনা মাঙজিন থাবা লৈবাক ১৫ না শরুক য়াবা য়ুনিভর্সেল নেটৱার্কিং লেঙ্গোইজ (UNL) হায়বা অসিদা য়ূম্ফম ওইদুনা খেন্নবা লোনশিংগী মরক্তা ফাওননবা (ইন্টরলিঙ্গুৱা) অমা চাওখতহন্নবা হোতনৈ ৷ (আই আই টি বোম্বেনা, অতোপ্পা লোনশিংদসু পানশিনবা য়াগদবা, ইংলিশ অমসুং ভারতকী লোনশিংদা মেচিননা লোন-হন্দোক্নবা খূতলায়, পাম্বৈ অমসুং মখল-মখা কয়াগী পোত্থোকশিং হান্ননা পুথোকখ্রে ৷)