ৱাহৌদোক

ভারততা হন্দোকপগী থবক্সি লোন কয়ামরোমদা পাঙথোক্নরম্বগী খূদম লৈ ৷ মসি অহানবদা সংস্কৃত, পালি, প্রাকৃত অমসুং মচিন তুমখতলক্লিবা লম-লমগী লোনশিংগী মরক্তা নত্ত্রগা পনখ্রিবা লোনশিং অসিগী মরক্তা, অদুগা অমুক্সু, লোনশিং অদুগা এরাবিক নত্ত্রগা পার্সিয়ান লোনশিংগগী মরক্তা পাঙথোক্নরম্মী ৷পঞ্চতন্ত্র, অষ্টাঙ্গহৃদয়, অর্থশাস্ত্র, হিতোপদেশ, য়োগশাস্ত্র, রামায়ণ, মহাভারত অমসুং ভগবদগীতা অসিনচিংবা ৱারী লাইরিক অমসুং ৱাখল-লৌশিংগী লাইরিকশিং অসি অরাবিক লোন্দা ৮ অমসুং ১৯শুবা চহীচাগী মতমদা হন্দোকখি ৷ মতম অদুদা পার্সিয়ান অমসুং ভারতকী অইবা মচাকশিংগী মরক্তা ওন্থোক-ওনশিন তৌনরম্মী ৷ ভক্তিকালগী মতমদা সংস্কৃতকী অইবা মচাকশিং মরু ওইনা ভগবদ গীতা অমসুং উপনিষদশিং ভারতকী অতোপ্পা লোনশিংগা হন্দোক্নরকপা হৌখি ৷ মসিগী মহৈ ওইনা, লাইনীংবা কবি গ্যানেশ্বরনা গীতাদগী হন্দোকপা মগুন লৈরবা লাইরিক গ্যানেশ্বরি ইহনখি অমসুং তোঙান-তোঙানবা লোন কয়াগী লাইনীংবা কবিশিংনা অখন্ননা রামায়ণ অমসুং মহাভারতপুসু কোম্না হন্দোক্তুনা পুথোকপা ঙমহনখি ৷ মসিগী খূদম কনাগুম্বা অমনা পম্পা, কম্বর, মোলা, ইজুথাকচান, তুলসিদাস, প্রেমানন্দ, একানাথ, বলরাম দাস, মাধব কন্দলি কৃতিবাসকী রামায়ণনচিংবদা উবা ফংগনি ৷

লোন হন্দোকপগী থবকসি লোইলম শাসনগী মতমদা য়ুরোপকী অমসুং ভারতকী লোনশিংগী মরক্তা মরু ওইনা সাংষ্কৃত লোন্দা খঙহৌদনা হেনগতলকপা উবা ফংই৷ জর্মন, ফ্রেঞ্চ, ইটালি, স্পেনিস অমসুং ভারতকী লোনশিংগী মরক্তা লোন হন্দোক্নবগী থবকসি পাঙথোক্নরবসু, লৈবাকশিংগী লুচিংবা ওইবগী থাক্তা লৈরিবা লোইলম চূপ্লি পায়রিবা মপুশিংগী লোন ওইরিবা ইংলিশ লোন্না হেন্না খুদোং চাবা ওইনা লৌনরম্মী৷ বৃটিশনা পানবা মতমদা, ইংলিশ লোন্দা হন্দোকপগী অৱাংবা থাক অসি কালিদাসকী অভিজ্ঞান শকুন্তলমবু ৱিল্লিয়াম জোননা হন্দোকপদা উবা ফংই ৷ হৌজিক্তি, লাইরিক অমা ওইনা শকুন্তলম ভারতকী নাত্কী ওইবা ইকায় খুম্নবগী অমসুং ভারতকী চতন-ৱাখল্লোনশিংগী মমি তারিবা মরু ওইবা লাইরিকশিংগী মনুংদা অমা ওইরি ৷ মসিনা মরম ওইদুনা, ১৯ সুবা চহীচাদা মতৌ করম্না শকুন্তলমবু ভারতকী লোন ১০ হেনবদা হন্দোকহনখিবগে হায়বদু ঊতলি ৷ ওরেন্তেলিষ্টশিংগী মীতয়েংদা লোইলম লৈঙাক্লোনগী মতমদা লোন হন্দোক্নবা হোতনরম্বসি (মপান্দগী) নৌনা লাকপা অঙম-অথৌশিং অদুনা ভারতকী মরমদা থুনা ভাব তানবা, চতন-লোনচতশিং খঙনবা অমসুং মসিনা ভারততা লৈঙাকপদা খুদোং চাহন্নবনি হায়না লৌই ৷ ভারতকী মরমদা মখোয়না অপাম্বা মওংদা হন্দোকপা অদুগী মতাংদা, ভারতকী ইংলিশ লোন্দা হন্দোক্লিবা লোন হন্দোক্লোয়শিংনা মদুবু শেমদোক-শাদোক্নবা অমসুং অমুক হন্না য়েংশিন্নবা ফোঙদোকই ৷ করিগুম্বদনা থায়নগী ওইবা, অরিবা লাইরিকশিংগী মতাংদা বৃটিশকী মীতয়েং অদুগী মায়োক্তা য়ানীংদবা ফোঙদোকখি ৷ রাজা রাম মোহন রায়না হন্দোকপা শঙ্করগী বেদান্ত, কেনা অমসুং ইসাভাস্য উপনিষদশিং অসি ইংলিশ লোন্দা ভারতকী মায়চৌশিংনা হন্দোকপা অহানবা লাইরিকশিংনি ৷ মসিগী মতুং তারকপদা ঋগ বেদ, উপনিষদশিং, রামায়ন, মহাভারত অমসুং সংষ্কৃতকী লিলা খরা আর সি দত্তনা হন্দোকখ্রে ৷ মসিগী হন্দোকখ্রবশিং অসি ভারতকী রোমান্তিক অমসুং য়ুটিলিতরিয়নশিংগী ৱাখল্লোনশিংদা শীংনবা ওইনা থোকথি ৷ মদুগী মতুং তারকপদদি লোন হন্দোকপগী অচৌবা ঈহৌ অমা লাকখ্রে ৷ মতম অসিগী হন্দোক্লোয়শিংগী মমিং খরা পনবা তারবদি দীনবন্ধু মিত্র, ঔরোবিন্দো অমসুং রবিন্দ্রনাথ টেগোরনি ৷ ভারতকী লোনশিংগী মরক্তা হন্দোকপগী থবকসিসু মশীং য়ামজদ্রবসু মতাং অসিৱায়দগী হৌরে হায়বা য়ারে ৷

অদুম ওইনমক, অশেংবদদি, ইংলিশ লোনসি হৌজিকসু লাইরিক-লাইশু হৈরবা মীওইশিং ফাওবনা খঙবা অমসুং খূতলোয়বা ঙমদবা লোন অমা হৌজিকসু ওইরিবনা কান্নরবা ৱাখল-লৌশিং পীবা অইবা মচাক কয়া অমা ভারতকী লোনশিংদা হন্দোক্লবতদা ফীবম অসি মপুং ফানা ফগত্হনবা ঙমগনি ৷ মতাং অসিদা গান্ধীজীনা লোন হন্দোকপগী মতাংদা থম্লম্বা মীতয়েঙ অদু নীংশিংবা য়াই- “ইংলিশ লোনবু ঐনা মালেমগী ললোন-ইতিক্কী অমসুং শেন-থুমগী হীরমদা চাওখত্হনবা য়াবা লোন্নি হায়না থাজৈ, মরম অসিনা মী খরনা লোন অসিবু তম্বগী তঙাই ফদবা লৈ.... অদুগা ঐনা মখোয়বু তশেংনা ইংলিশ লোনবু মপুং ফানা খূতলোয়হন্নীংই অদুগা মখোয়না ইংলিশ লোন্দা লৈরিবা অফবা থবকশিং অদুবু লম-লমগী লোনশিংদা হন্দোক্লক্কনি হায়বগী থাজবা থমই৷” ইংলিশ লোন্না লাইরিক-লাইশু তাকপী-তম্বীবগী লোন অমা ওইহনবনা ভারতকী লোনশিংগী চাওখত্ খোঙথাংদা অথিং-অয়েত্ পীরক্কনি হায়নসু মহাক্না খল্লমই ৷

লোইলম শাশন লাকত্রিঙৈগী মমাঙদা ভারতকী লাইরিক-লাইশু তম্বগী চতনবী অসি পাঠশালা অমসুং মক্তবশিংগী মতুং ইন্না, মহৈশঙগী শিক্ষাদা সমাজগী মরু ওইবা চতন-পথাপশিং তম্বীনবা অমসুং খুনুং লোন্দগীনা অৱাংবা লোন ফাওবদা লৈরিবা মওংশিং অদুগী লোন্মীতলোনগী মরমদা খঙ-হৈবগী ওইবা অনেম-অৱাংগী চাং শেমদুনা লোনশিংগী মরক্তা মুচুয়ল ইন্তেলিজিবিলিতি পুরকপা অমসুং মরী ফগত্হন্নবনি হায়না এল এম খুবচান্দনিনা লৌরম্মী ৷ মখল মখা কয়াগী লোন অমদি ময়েক তম্বা হায়বসিনা তম্লিবা মহৈরোয়শিং অদুবু লোনগী মচাকশিংগী মরমদা কান্নরবা লৌশিং কয়া অমা হাপ্পী ৷ ভারতকী তোঙান-তোঙানবা লোনশিং অসিদা খুদোং চারকত্রদুনা, লোইলম লৈঙাক্লোনগী মপুশিংনা/অঙম অথৌশিংনা, ভারতকী লাইরিক তম্বগী মওংসিদা মোনোস্তিক্কী পাম্বৈশিং হৌদোকখি ৷ মসিনা ভারতকী লোনশিং অমসুং ইংলিশ লোনগগী মরক্তা মূক্নবা অমদি থোকহনখি ৷ মেককলেনা ইবা লাইরিক ‘মাইনুত ওন ইন্দিয়ান ইজুকেশন’(১৯৩৫) অমসুং মহাক্কী মমাঙদা লৈরম্বা মীওইশিংনা তৌরম্বা থবকশিংদা, ভারতকী লোনশিংবু থৌওইখিদে হাযবা উবা ফংই ৷ লোইলম লৈঙাক্লোনগী চতনবী লোইখ্রবা মতুংদদি মমালোন্দা লাইরিক-লাইশু তাকপী-তম্বীবগী অচৌবা শাফু অমা হৌরকখি/লাকখি ৷ মসিদা অঙাং অমনা লাইরিক তম্বদা মমালোন্দা তম্বনা হেন্না খুদোং চাই অমসুং থুনা খঙহনবা ঙমহল্লি/ভাব তাহল্লি হায়বা য়ুনেসকো (UNESCO)অমসুং মেদিয়া ওফ ইনষ্ট্রক্সন্না ফোঙদোক্লকপা ৱাফম অদু লোনগী চাওখত খোঙথাংগীদমক লৈরিবা মকোক থোংবশিংনা লৌরকপদগীনি ৷

মরম অসিনা, ঐখোয়গী সমাজ অমসুং ঐখোয়গী শিন্দমশঙশিং অনীমক্তা, সমাজবু মশক তাক্লিবা তোঙান-তোঙানবা লোনশিংগী মফম অমা শেমগত্পগী তঙায়ফদে ৷ মসি ওজা অমদি মহৈরোয়শিংদা ৱারেং-শৈরেং কয়াগা লোয়ননা ৱাখল লৌশিংগী ওইবা অইবা লাইরিকশিংবু মশীং য়াম্না ফংহল্লবা মতমদতা ওইথোকপা ঙমগনি ৷ ৱাখল-লৌশিংদা য়ূম্ফম ওইবা অইবা লাইরিকশিং অসি নোংচুপলোমদগী (ভর্তিকেল ওইবা মওংদা) অমুক লৌরুবা তৌদনা অসিগুম্বা লাইরিকশিং অসি ভারতকী লোন অমদগীনা অতোপ্পা লোন অমদা (হোরাইজেন্তল ওইবা মওংদা)হন্দোকপগী তঙাইফদবা লৈ (সিংহ ১৯৯০)৷

খ্বাইদগী হেন্না ফরবা ৱাখল-লৌশিংবু মশাগী মমালোন্দা খঙনীংলিবা ভারতকী মীচম প্রাজাশিংদসু, নুপা-নুপী খায়দনা হায়রিবা ৱাখল-লৌশিং অসি ফংহনগনি হায়বসি ঐখোয়গী অচেত্পা থাজবনি ৷ ৱাফম অসিদা য়ূম্ফম ওইরগা জাতিগী লোন হন্দোকপা মিশন (এন তি এম)গী ৱাখল্লোন শাফোংলকখি ৷