মরী মখোঙ

প্রধান মন্ত্রীগী ৱারোল
জাতিগী লোন হন্দোকপা মিশন(এন তি এম)গী ৱাখল্লোন অসী ভারতকী প্রধান মন্ত্রীনা ইহান-হান্না হৌদোরকখি ৷ য়াম্না লুরবা হীরম কয়াদা হন্দোক্লবা মচাকশিংনা লাইরিক-লাইশুগী লমদা শরুক য়াবা অমসুং মখা তমথবদা মতৌ করম্না গ্যান হেনগত্হনবগে অমসুং মতেং পাংবগে হায়বদু মহাক্না নেশনেল নোলেজ কমিসন (NKC) গী অহানবা মীফমদা ফোঙদোকখি ৷ শ্রী শাম পিত্রোদানা সভাপতি ওইখিবা মীফম অদুদা পীনরকপা ৱাখল্লোনশিং লৌরবা মতুংদা, তোঙান-তোঙানবা লোয়শঙ নত্ত্রগা মহৈশঙশিং অথুবা মতমদা লিংদুনা লোন হন্দোকপগী মহৈ-মশিং পীবগী তঙাইফদবদু ফাওনখি৷

মরী মখোঙ
চুম্মী, লোন হন্দোকপা হায়বসি ভারততা চত্থরিবা থবক অমনি৷ মতাং অসিদা, মীয়ামদগী কান্নরবা পাউতাক কয়া লৌবগী তঙাইফদবা লাক্লিবসি লৈবাক খেন্নবা অদুগা হন্দোক্লিবা হীরমশিংদা খেন্নরকপগা লোয়ন-লোয়ননা লোনশিং অদুগী মগুন, শীজিন্নফম অমসুং ফংফমশিং খেন্নরকপদগীনি ৷ লৈরিবা তোঙান-তোঙানবা চাওখতলকলিবা হীরমশিং খুদম ওইনা সাহিত্য, পিয়োর সাইন্স, এপ্লাইদ সাইন্স, সমাজ বিগ্যান, লৈবাক-ৱায়েন, হিদাক-লাংথক, খূত্শু-খূতলায় অমসুং অতোপ্পা হীরম কয়াদা লোন-হন্দোক্নবা নাকল কয়ামরোমদগী তকশিল্লক্লি ৷

লোন-হন্দোকপগী খূত্থাংদা পীরিবা ঈ-পাউ অসি মপুং ফানা অমসুং মান্ননা ফংহনবা ঙমদ্রি ৷ লোন-হন্দোক্লবা মচাকশিং খঙহনবা নত্ত্রগা ফংহনবগী থবক্সিদসু পূক্নীং পেন্নীংঙাই ওইদ্রি মরমদি, পাবা ফংগদৌরিবা মীওইশিং অদু হেনজিন্না মশীং য়াম্লগা কাঙলূপ খেন্নবা অদুগা অমুক্সু লোন-হন্দোক্লবা মচাকশিং কৈথেলদা ফংহনবগী মতাংসিদসু অফবা (নীংথিজনা) থাজবা পীবা ঙমদবগা লোয়ননা লৈরিবা ফিভম্নচিংবগী মতাংদা খন্নবা ৱাত্পা অসিনি ৷ মগুন লৈরবা লোন-হন্দোক্লবা মচাকশিং চাং মান্ননা য়েন্থোকপা নত্ত্রগা ফংহল্লবতদা মশক খঙবা থাক অমা শেম্বা ঙমগনি অমসুং হীরমসিদা লন্নাইগী ওইনা চত্থরিবা থবক থৌরমশিংবু মতিক চানা শাফু পীবা (শৌগত্পা) ঙমহনগনি ৷ অফবা, মগুণ লৈনা হন্দোক্লবশিং তোঙান-তোঙানবা হীরমশিংদা ফংবা ঙমহন্নবা লন্নাই ওইনা থবক চত্থরিবা কাঙবুশিংবু পুক্নীং থৌগত্পা য়ানবগীদমক মীয়ামগা নকশিনবা মরী থমদুনা মোত লৌবগী তঙাইফদবসু মিশন অসিনা হোতনরি ৷ হন্দোকপগী থবক অসিনা হকথেংননা নত্ত্রগা নাকোয়ননা থবক পীবসু ঙমহল্লি ৷ অসুম্না, লাইরিক-লাইশুদি হৈরগা থবক্তি ফংদ্রিবা মীওইশিংদা মশাগা চানবা খূত্শুমন পীদুনা পূক্নীং থৌগত্পসু ঙমহল্লি ৷

ৱাখল্লোন অসিদগী, নেশনেল নোলেজ কমিসন্দা থবক তৌগদবা মীওই কাঙলূপ অমা দোক্টর জয়ন্তি ঘোসনা লুচিংদুনা শেম্লক্নবগী পূক্নীং চঙহনখি ৷ কাঙলূপ অসিনা, লোন হন্দোক্লিবা অমসুং ফোঙদোক্তুনা মীয়ামদা ফংহল্লিবশিংগা তোঙান-তোঙানবা লোয়শঙশিংগা নক্নহল্লি৷ কাঙলূপ অদুদা সরকারগী অমসুং সেমি ওইবা সরকারগী লূপশিং, লাইরিক-লাইশুগী লমদা খঙ-হৈরবশিং, লোনগী মরমদা খঙলবশিং, লোন হন্দোক্লোয়শিং, ফোঙদোক্লোয়শিং অমসুং হন্দোকপগী থবক্তা লৈরিবা মীহুতশিং য়াওরি৷ ইংশোক ২০০৬কী ফেব্রুৱারী থাদা দিল্লিদা পাঙথোকখিবা অহানবা মীফমদা ভারতকী লোনশিংগী নৈন-শঙলেনদা দিরেক্টর ওইরিবা প্রোফেসর উদয় নরায়ন সিংহনা হীরম অসিগী মনুং চল্লক্কদবা চাউরাকপা কয়াতশিং য়াত্থোক্তুনা ফোঙদোকখি ৷ ইংশোক ২০০৬কী মার্চ থাগী তাং ৬তা জাতিগী লোন হন্দোকপা মিশনগী ওইবা কমিতিগী মীফম শীন্দোক-শীনজিন তৌরিবা প্রোফেসর জয়ন্তি ঘোসনা এন কে সিদগী পীরকপা পাউতাকশিং অমসুং চুমথোক্লবা থাঙ্গত্ ৱারোলশিং অদু প্লানিং কমিসনগী দিপুতি চ্যেরমেনদা চেরোল অমগা লোয়ননা খঙহনখি ৷ মতুং তারকপদা, মীওই কাঙবুশিং অসিনা কয়ারক হন্না উন্নখ্রে অদুগা নুমিত নীনীগী ওইবা ৱার্কসোপ অমা ইংশোক ২০০৭ কি এপ্রিল থাগী তারিখ ১২ দগী ১৩ ফাওবদা সি আই আই এলদা পাঙথোকখি ৷ শোক ২০০৬ কী এপ্রিল ১৯ দনা চুমথোক্লবা থাঙ্গত্-ৱারোলশিং অদুগী মতাংদা প্লানিং কমিসন্না ৱাহং মঙা পুখতলকপগা লোয়ননা লেটর নম্বর P.11060/4/2005-Edn পুখতলকখি (ৱাহংশিং অদুগী পাউখুম পীখ্রে)৷ মরক অসিদা সমাজ বিগ্যানগী লমদা খঙ-হৈরবা মীওই কয়ানা মরু ওইনা সেন্টর ফোর দি ষ্টদি ওফ দেবেলপ্পিং সোসাইটিজ (CSDS) অমসুং অতোপ্পা ইন্দিয়ান কাউন্সিল ওফ হিষ্টোরিকেল রিসর্স (ICHR)গুম্বা শিন্দমশঙশিংদগী মখোয়গী ওইবা অকূপ্পা অফ-ফত্তগী ওইবা ৱাফম কয়া ফংখি ৷ মসিনা অনৌবা ৱাফম কয়া অমা থোরকহনবদা নত্তনা এন তি এমগী মীতয়েং অমসুং থবক থৌরমসিংদা কান্নরবা পাউতাক কয়া অমা পীরকখি ৷ মসিগী মনুংদা খরদি প্রোজেক্টকী অকূপ্পা পাউদমশিং য়াওরি ৷ শোক ২০০৬ কী জুন ২১ অমসুং জুলাই ৩ দা লোন-হন্দোকপগা মরী লৈনবা পাউতাক কয়াসু উনম্ফম কয়াদগী ফংখি ৷ মতুংদা, ইং ২০০৬ কী আগষ্ট ৩১ দা মিনিস্ত্রি ওফ ঐচ আর দিগী লোনশিং অমসুং লাইরিক চাওখতহনবগী থবক তৌরিবা মীওই কাঙবুনা ৱাখল্লোন অসিবু ১১ সুবা থৌরাং পরিংগী মনুং চলহন্নবগী প্লানিং কমিসনদা তকশিনখি ৷ মতুং তারকপদা অমুক, ইংশোক ২০০৬, সেপ্তেম্বরগী তাং ১দা নেসনেল নোলেজ কমিসনগী চ্যেরমেন শ্রী শাম পিত্রোদানা, এন তি এমগী অকূপ্পা মরোল য়াওবা চেরোল অমা প্রধান মন্ত্রীদা ইদুনা খঙহনখি৷ মসিগা ঈরোয়ননা মপূং ফারবা থাঙ্গত-ৱারোল অমসু ঐচ আর দি (HRD) গী লোয়শঙনা শেমখিবনি৷