পান্দমগী কান্নবা ফংগদৌরিবশিং

মিশন অসিনা কান্নবা পীগদৌরিবশিংগী পান্দম য়াত্তুনা থম্মি ৷ অদুবু খ্বায়দগী অহানবদা কান্নবা ফংহনগদবা মীওইশিংদি, ইংলিশ লোন্দনা মরু ওইনা ফংলিবা খূত্শু-খূতলায় অমসুং বিগ্যানগী ওইবা ৱাখল-লৌশিং তাঙনা ফংলিবা নত্ত্রগা ফংবা শুকঙম্মক ঙমদ্রিবা, লৈফম নত্ত্রগা হৌরকফমগী (মরু ওইনা খুঙ্গং অমসুং সেমি অর্বানগী ওইবা) লোয়ন-লোয়ননা সমাজগী অনেম অৱাংগী থাক্কী মরম্না হেন্না শোত্থহৌরবা মহৈরোয়শিংদা ওইগনি ৷ ৱাখল-লৌশিং ফংহনবগী মথৌ তারিবা ঐখোয়গী সমাজগী শোত্থহৌরবা কাঙবুশিং অসিদা তোঙান-তোঙানবা হীরমশিংদগী হন্দোক্লবা অইবা মচাকশিংবু ফংহল্লবা মতমদতা মিশন অসিগী অচুম্বা পান্দম হায়বদু ফংবা ঙমগনি ৷

অদুম ওইনমক, মসিবু ফংহন্নবা হোতনবদা, য়াম্লবা মীওই কাঙবু অমদসু মসিনা কান্নবা পী ৷ খুদম ওইনা:
১. সাহিত্য অমসুং ৱাখল-লৌশিংগী লাইরিকশিংবু মশামক্কী লোনশিংদা পাজনীংবদগী ঈখৌরাংনা ঙাইরিবা মীয়ামশিং
২. মতিক চাবা খূত্শুমনগা লোয়ননা থবক পীগদৌরিবা মশীং য়াম্লবা হন্দোক্লোয়শিং
৩. লোন-লোনশিংগী পূক্নীং চিংশিন্নীংঙাই ওইবা অমসুং অনৌবা লাইরিকশিং থিরিবা ফোঙদোক্লোয়শিং
৪. মহৈশঙ, মহৈশঙলেন অমসুং তাইবং মহৈকোলশিংদা তাকপী-তম্বীরিবা ওজাশিং
৫. লোন য়াম্না ঙাঙনবা মফমদা, মরন্নাই চোংথোকচদুনা ফোর্মেল নত্তবা মহৈ-মশিং ফংহল্লিবা মীওইশিং
৬. প্ৰজাগী হকশেল, মীয়ামগী অধিকারশিং, অকোয়বগী ফীবম, বিগ্যানবু হেন্না মশক থোকহনবনচিংবগী থবক তৌরিবা সরকারগী নত্তবা লূপশিং
৭. লোন-ফাওনরোয়শিংবু ফংনীংদুনা থিরিবা এজেন্সিশিং
৮. লোন-ফাওনবগী দরকার ওইরিবা লমকোয়বশিং অমসুং মপান লৈবাক্তগী লাকপা মায়চৌশিং
৯. ফিল্মগী সাব-টাইটল (subtitle) পীনবা হোতনরিবা ফিল্ম নমদুনা পুথোক্লিবা অমসুং ফিল্ম শন্দোক্লিবা মীওইশিং
১০. তোঙান-তোঙানবা লোনশিংদা থৌরম শন্দোক্নবা হোতনরিবা এফ এম অমসুং রেদিওগী কাঙবুশিং
১১. হন্দোকপা তম্লিবা শিন্দম্লোয়শিং
১২. তাইবং মহৈকোল অমসুং অতোপ্পা শিন্দমশঙশিংদা লৈরিবা লোন-হন্দোকপগী মশঙশিং
১৩. হন্দোকপগা মরী লৈনবা হীরমশিংদা লৈরিবা থিজিল্লোয়শিং
১৪. হন্দোকপগী শোফৱ্যের শেম্লিবা মীওইশিং
১৫. সাহিত্য চাংদম্নরিবা মায়চৌশিং

অনুকৃতিগী ৱেবসাইত অমসুং সাহিত্য একাদমিগী হান্না নমখ্রবা ‘জাতিগী হন্দোক্লোয়শিংগী মিংজন’ (National Register for Translators) চেশিংদা য়াওহনখ্রবা হন্দোক্লোয় মশীং হেনগত্হনবনা লোন-হন্দোকপগী ইন্দাষ্ট্রিগী মগুন হেনগত্হনবা ঙমগনি ৷ মসিগীসু মথক্তা, লোন হন্দোক্লোয়শিংগী কাঙবুশিং (ঙসিসু কয়া অমা লৈবাক অসিদা লৈরি) লোয়ন-লোয়ননা লন্নাই লাইরিক ফোঙফমশিংদগী লাকপা হন্দোক্লোয়শিংগী কাঙবু য়াওহন্নীংবগী অপাম্বা লৈ ৷ দরকার ওইরিবা সরকার অমসুং অতোপ্পা এজেন্সিশিংদা হন্দোক্লবা অখন্নবা অইবা মচাকশিং অতেনবা মতমগী মনুংদা ফংহনবা ঙম্নবা হোতনরিবা থবক খুদিংমক্সি য়াম্না হৈ-শিংনা শীন-লাঙবগী মথৌ তাই ৷ মসিগীসু মথক্তা, ‘অনুবাদ মেলা’ (লোন হন্দোকপগী মেলা অমসুং মসিগা মরী লৈনবা থৌরমশিং অপীকপা শহরগী মফমশিং ফাওবদসু শীন্দুনা) অমসুং ‘হন্দোক্লোয়শিংগী শিল্লম-শিন্দমগী থৌরাংশিং’ পাঙথোকপনা চঙগদৌরিবা মীশিংগী চাং খঙদোকপদা মতেং পাংগনি ৷ মসিনা হন্দোকপগী ইন্দাস্ত্রি কয়া অমদা কান্নবা পীগনি হায়না ঐখোয়না থাজৈ ৷

মীচম প্রজাশিংদা হেন্না কান্নবা পুরকপা ঙমহন্নবগীদমক অমসুং লাইরিক তাকপী-তম্বীরিবা অদুগা থিজিন-হুমজিল্লিবা শিন্দমশঙশিংদা মরাং কায়না ফংহনবগী দরকার ওইবনা, ফোঙলবা লাইরিকশিং অদুগী মমল য়াম্না তাঙদবা হায়বদু ওইহনগদবনি ৷ অসিগুম্বা অইবা মচাকশিং খুদিংমক সি আই আই এলগী সর্বরদগী এন তি এমনা শীন-লাঙদুনা অচৌবা ৱেবসাইত অমদা মমল লৌদনা লেম্না ই-বুক (e-book) কী মওংদা ফংহনগনি ৷ ঐখোয়গী নেটতা পীরিবা মচাকশিং অসি শীজিন্নরিবা মীওইশিং অদুগী রেকোর্দ থম্বা ঙম্নবগীদমক শূপ্নগী রেজিস্ট্রর অমখক্তি থমগনি ৷ মতুং তারকপদা লোন হন্দোকপগী খূত্শু-খূতলায়শিং ওইরিবা লোনগৈ, ৱাহন-লোনগৈ, ৱার্দ ফাইন্দর, কনকোর্দেন্স, ইতিমোলোজিগী লোনগৈ, ভিজুয়েল অমসুং ওদিওগী লোনগৈ অসিনচিংবা খুদিংমক হাপচিন্দুনা মীপুম খুদিংমক্তা ফংহনগনি ৷

তোঙান-তোঙানবা লোন জুরাশিংগী মরক্তা দিজিটেলগী ওইবা লোনগৈশিং অমসুং ‘মেচিনগী মতেংনা লোন হন্দোক্নবা শোফৱ্যের’ শেমগতনবা হোতনবদা এন তি এমনা অহানবা মীতয়েং থম্মী ৷ অদুবু তাইবং মহৈকোলশিং, আই আই আই টিশিং, টি আই এফ আর অমসুং আই আই এস সিগা পূন্না অতোপ্পা অচৌবা শোফৱ্যের কয়ানা মেচিন্না লোন হন্দোকপগী (Machine Translation, MT)অরুবা ৱাফম কয়াদা চহী ২০ হেন্না হোতনরক্লি ৷ অদুবু হৌজিক ফাওবা অশোয়-অরান য়াওদবা অফবা খূতলায় অমা পুথোকপা ঙমদনা লৈরক্লি ৷ মরম অসিনা, এন তি এমনা হীরমসিদা য়াম্না চেকশিনবা মীতয়েং থমদুনা হোতনগনি ৷ হীরম অসিগী মতাংদা শরুক খরদি (খুদম ওইনা দিজিটেল লোনগৈশিং, ৱার্দ ফাইন্দরশিং, ৱাহন-লোনগৈশিং অসিনচিংবা) মাঙজৌননা অতোপ্পশিং (খুদম ওইনা ওতোমেটেদ টুলশিং) দগী হান্না পায়খতপা হৌরগনি ৷